Andres Bonifacio
Si Andres Bonifacio y Castro (30 de noviembre de 1863 – 10 de mayo de 1897) amo un lider del revolucion na Filipinas contra del español colonial gobierno, el primero revolucion na Asia contra un europeo colonial gobierno. En 1892, ya fundi el secreto revolucionario sociedad el Katipunan, que maga adelante, ya convirti como el base del revolucionario ejercito del maga filipino.
Ya naci con un pobre familia del Manila en 1863, si Bonifacio amo uno del maga lider del Katipunan. Muy radical el su postura, y ele amo partidario del armada acción contra el maga español. Ya inflama el indígena masa y ya incita el su maga seguidor na que el inicia un rebelión contra del maga «kastila». Cuando si José Rizal ya crea el Liga Filipina, en 1892, si Bonifacio amo uno del maga poco integrant que no ya acepta el pacífica vision de Rizal.
Si Bonifacio ay apoda el titulo “Supremo” del Katipunan, y más adelante, ele ya logra establece un revolucionario gobierno (Pamahalaang Mapaghimagsik).
El 23 de agosto de 1896 ay sucede el “Grito de Balintawak”, un reunion del maga miembro del Katipunan na Balintawak donde que ellos ya adopta el decisión de levanta en armas al grito de “¡Viva Filipinas!” “¡Viva el Katipunan!”. El día 25 de agosto ay ocurri el maga primero armado conflicto. Cuando el maga revolucionario ya efectua un elección para el naciente republica na Tejeros, si Aguinaldo ay electo Presidente, mientras si Bonifacio Director del Interior. Si Bonifacio y el su faccion del maga “Magdiwang” ya enfrenta contra el otro facción, el maga “Magdalos”, dirigido por Emilio Aguinaldo cuando el maga Magdalos ya lanza un campaña de desprestigio contra Bonifacio, que considerado no apto para el cargo. Si Bonifacio ya respondi en vía del desafia con el legalidad del eleccion y del rechaza con el maga resultado del mismo. Ya estalla un escaramuza, donde si Procopio (el hermano de Andres) amo resulta herido. Luego, si Bonifacio y el su maga seguidor ya fuga del sitio, pero si Bonifacio y el su hermano ay captura. Ellos ay someti, junto con el su hermano, na un juicio delante del Concilio de Guerra, donde ellos ay halla maga culpable de sedicion y traición y condenado a muerte. Ellos ay ejecuta, bajo un administrativo orden, por el maga fuerza de Aguinaldo el día 10 de mayo, 1897, en el bosque del monte Buntis de Cavite.