Carta con su nieta

Carta con su Nieta

Por Teresita Ejercito Santo Tomas

Con mi Querida Nieta Nicole,

Seguro no pa es el tal tiempo para yo tener que escrivir contigo, pero para mi, mi hora es corta. Tiene yo miedo de parece en este mundo muy temprano. Por casa de mi enfermidad. Todo el dia a cavar de comer. O antes de duerme el siesta. Tiene nisos dos umpoco de cuento como el fantacia, fabola, cinderela, y otras cosas pa. Ahora quiere yo que dale sabe contigo mi vida, siempre con aquel tiempo que yo es chiquilla pa como tu.

Como yo numas el, unica hija. Tu grand Lola Ester, mi madre, grand—grand Lola Turing, tu grand papa Ding y tu grand-grand Lolo Rosendo ya cuida conmigo muchong-mucho. Yo es el unica y querida hija, subrina y nieta de ellos. Ellos naman es mi companiero de juego. Pero tiene yo tiempo para resar, y dale gracia con el Dulcisimo Dios. Como el : oracion, reso antes de comer, antes de durmir, y al despertar por la manana y el siesta. Acavar el reso, tenemos de bezar a mi madre Ester. Mi tiyo Ding y con mis abuelos y abuelas en el carillos o en la mano. Tiene siempre yo tiempo para bañar. Tu grand-grand Lola Turing el que dar bañar conmigo, como qui ta hace yo contigo. Sultera ya yo ta dale bañar pa conmigo grand-grand Lola Turing con javon de cuerpo. Gogo con calamansi para na pelo. Con aquel ta na High School ya yo ya hace compra conmigo tu grand-Papa Ding “Halo Shampoo” para mi pelo y muchas “Rollers” y polvo oloroso para adorna mi pelo. Ella siempre el que ta dale muda conmigo hasta que antes yo de cazar con tu “Daddy Tony”

Desde chiquilla hasta que cazar con tu “Daddy Tony” tiene yo permanente hora para mi estudio na piano. Tu grand-Papa Ding es mi maestro. No hay yo tiempo para limpiar al casa de nosotros. Porque malo dice es para mi mano y estudio na piano. Tiene yo una cosa que no ta gusta con ellos disciplina, estoy es el modo de escuchar ala ventana. Un dia, mientras no hay tu grand-grand Lola Turing ya hila yo el silla enfrente del ventana. Escuchar con todo mis gana. No yo parice que tu grand-grand Lola Turing es en mi detras. El castigo que dar con migo es media hora de hincar con el dos brasos altos. Des de aquel ya toma yo precente de siguir todo qui ta encarga conmigo. Si tiene nisos visita, los chiquillos y chiquillas no puede de intritine en medio delos viejos y viejas.

Mucho siempre yo julgete muñeca, Tu grand Lola ester mi madre el que ta sustenta la familia. Ella es un Dentista con profesion, es un Nurse siempre. Tu grand papa Ding es un compositor de musica. Un professor en la Universidad de Pilipinas.

Si dia de Sabado y Domingo tu grand-Papa Ding el compañero de mi na concierto de los prominente pianista, compositor, conductor, cantora y simponia del Pilpinas, baile de ballet y zarzuelas. Ta mira siempre nisos juego del “Basket Ball” en el “Rizal Memorial” Al reterar, ta hace compra el conmigo muchas mansanas, ubas y cajel.

En casa el numero uno critico de mi musica y leccion na piano es mi abuela tu grand-grand Lola Turing. Ta tuca ella el alfa. Con ella nisos ya inheredar las musica, y la adquicision excelente (excelent values), amor con el humano natural (Human nature), con hombre y derechos de todos humanos (human rights). Hasta que ya quida yo soltera, mi querida amiga es mi se escujir mi querido nobyo. Un hombre que de estar aqui na ciudad de Cavite. Con sus familia. Ama sus cultura, sus trabajo. Tedar el educacion de sus hijos. Miedo con Dios y primera mente. Respeto y amor con gusto la madre de sus hijos.

A Dies de Octubre mil nueve cientos quarenta y seis (1946) yo y mi madre tu grand Lola Ester encontrar un accidente que ya quida causa de sus muerte. Yo numa sola el qui ya quida vibo en la accidente. Una milagro el que ya aparece conmigo con aquel tiempo del accidente. Como tiene un fuerza que ya abre la puerta del bus que donde estoy embarcado. El puerta es echo de asero, tener que devide en la media y yo se entre en el medio del puerta, y despues que serra y agarrar con mi muy fuerte. Despues del accidente al puerta abre solas.

Tiene pa muchos milagro que ya aparece conmigo. Edad cinco yo con aquel tiempo aquel. Mi madre tu grand Lola ester tiene un mission del gobierno. Yo duerme solas en mi cuarto. Tengo un poste con luz imprente de mi cuarto. Derepente ya oir yo como tiene qui ta mina, ya abri yo mis ojos. Sabes tu tenemos un guapa mojer con ropa negro, aparado enfrente de mi cama, con lagrimas abundance. Tener que pregunto quien ella y donde esta mi Mama. Porque no hay responso que decir, voy a volver a mi cama para continuar mi sueno. Pero antes que todos, ya que tenir de garrar su ropa. Muchos tiempo que va a pasar. Na madrogada de mismo incidente. De aparece tambien, pero este segundo tiempo. No mas mojer si no un hombre triste que tiene corona de espinas en su cabesa, y sangre qui ta gutia en sus cara es mi visita. Otra ves yo te pregunto, donde esta mi madre, y como el primera ves, no hay responso. Por quriosidad tener que garrar sus ropa y volver a mi cama y duerme.

Muchos año a que ya pasa, ya muri ya mi Mama. Edad de catorse ya yo. Tener que bautizar conmigo. Mi madrina es senorita Hermina Victoriano y mi padrino es senor Oliver, su hermano. Sabes tu si cosa yo ya mira adentro del Iglesia? Con aquel mojer de negro y con lagrimas abundance. Triste ella. Ya abla mi madrina ella es la madre de Jesus Y aquel hombre triste con corona de espinas y sangre qui ta gutia en sus cara. Hingcao como ta risa. Segun siempre con mi madrina, el es Jesus. Segun con Padre Pedro Larena el cura paroco. Tiene mensahe o mission qui quierre que dar aparte conmigo el apariscion.

Tu grand-grand lolo Rosendo. Tiene siempre parte a mi vida masque con aquel vivo pa mi Madre tu grand-Lola Ester. Tu grand-grand Lolo Sendo el que ta asi pasia conmigo. Na casa municipal de Cavite. Ya quida eli un “Mayor” na municipio de Cavite. Con aquel tiempo de Presidente Manuel Quezon. Con aquel tiempo aquel, Presidente siempre el titulo del un alcalde. Presidente de un Municipalidad. Por casa muy estricto to grand-grand Lola Turing. No yo ta hace perjuicio si ta lliva conmigo sus amigos como sana Señor Zosimo Rojas, Zoilo Ronquillo. Pedro Bautista, el padre paroco del Iglesia Independiente y muchas otras pa. Ta asi siempre el pasia conmigo na carnaval, y ta asi sige siempre conmigo na cine. Con aquel ya casa yo con tu Daddy Tony, ya ayuda siempre el conmigo cuida con tu tiyo Boyeth(Marco).

Acavar la muerte de tu grand-Lola Ester ya tiene que adaptar tu grand-grand Lolo y tu grand-grand Lola Turing conmigo como de mas joven hija. Ta lleva yo ilos apellido ,Ester Teresita Salazar Ejercito.

Seguro tenemos que descanzar primero, por que sentirse malo y cansando. Rendido de muchas actividades del cuerpo y pensamiento. Quida sana tu buena hija con tu Madre y Padre: buena hermana con Nonoy tu hermano. Prendir mucho. Y dar attencion a todas las asignaturas. Come y duerme mucho. Desalija los enfermidades para tini largo vida. Llama a Dios y conforme al potencia del ESPIRITU SANTO, la guia y amor de su madre MARIA. Hasta la Vista.

Tu Querida Abuela, Mammu Chit (Teresita Ejercito Sto. Tomas)