Guillermo Larrazábal

Si Guillermo Larrazábal Arzubide (10 de febrero 1907 – 29 de julio de 1983) fue un español artista de vitral, activo na Ecuador. Considerao ele como el mas importante artista de vitral de Ecuador.

Biografia

Temprano vida y educacion

Ya nace si Guillermo Larrazábal na el Ciudad de Mexico el 10 de febrero de 1907, mientras que ya viaja el de suyo madre por alla. El de suyo maga padre, si Juan Domingo Larrazábal Basarrate y si Daniela Arzubide Villa, ambo oriundo de Bilbao, España. El de suyo padre fue un empresario que ya comercia con cacao y café. Ya crece si Larrazábal na un gran residencia na Bilbao, donde ele el menor de nueve maga hermano. Cuando ya tene ele con cinco maga año, ya contrae con meningitis y ya enferma gravemente; Despues de recupera ya queda ele mudo durante algun tiempo. Durante el primario escuela, ya encerra ele na el de suyo habitacion para practica habla frente a un espejo, y ya supera ele con el de suyo mudez despues de manada hora de practica. (Durante un rato, sin embargo, ya habla pa ele con un ligero tartamudeo.) Ya mori el padre de si Larrazábal na 1916, cuando ya tene si Guillermo con nueve maga año. Ya tene Guillermo con un dificil niñez, y muy religioso ele..

Ya cambia si Guillermo Larrazábal de escuela como niño, entre ellos un escuela de contabilidad. Ya pedi el profesor si Adrián Martínez con permiso para que estudia Larrazábal con el arte lang, y ya recomenda ele con si Larrazábal a cuanto academia de arte. Na 1932, ya recomenda si Martínez que uni si Larrazábal con el estudio de si Luis Lerchundi, un artista basao na Bilbao. Ya trabaja si Larrazábal bajo el pintor si Félix Cañada, conocio por el de suyo maga obra de art nouveau, particularmente na el Plantilla:Ill de Bilbao. Rapidamente ya avanza si Larrazábal na el estudio y pronto ya comenza ele a aprende con el maga tecnica de vitral.

Carrera na España

Durante el español civil guerra, ya arresta el republicano bando conele basao na maga falso acusacion y ya lleva conele a un campo de detencion. Ya pedi el de suyo madre con el maga amigo (del madre mismo) del bando con el liberacion de si Guillermo. Cuanto semana mas tarde, ya sufri ele con otro arresto, este vez por parte del nacionalista bando, pero liberao ele, de nuevo a instancias del de suyo familia. Ya intenta si Larrazábal pasa desapercibio despues de este maga incidente, pero encontrao y reclutao ele por el eeército de si Francisco Franco, ansina que ya pinta si Larrazábal con maga sello y maga bandera para Franco hasta el final del guerra na 1939.

Despues del guerra, pobre si Larrazábal. Ya incuntra ele con trabajo na el estudio Vitrieras de Arte na San Sebastián. Ya produci ele con maga estandarizao obra y ya senti ele oprimio por el falta de creatividad permitio a ele. Na 1951, despues de 12 maga año trabajando na el estudio, ya deja ele con este trabajo y ya traslada a un fabrica de ceramica na Madrid, y ya casa aquel mismo año.

Carrera na Ecuador

Maga ventana de vitral creao por si Guillermo Larrazábal na el Catedral de Cuenca.

Na 1955, ya busca el Iglesia romano catolico na Ecuador con maga artista na España para el construccion del Catedral de Cuenca. Ya elegi ellos con el español ceramista si Manuel Mora Iñigo como el de ellos agente na España, y ya contrata si Iñigo con si Larrazábal para el creación del maga ventana de vitral para el catedral. Ya muda si Larrazábal a Cuenca, Ecuador na 1955. Ya llega el de suyo esposa poco despues, masquen pronto ya separa el pareja.

Ya realiza si Larrazábal con 60 maga obra de vitral para el catedral de Cuenca, el mayor numero del de suyo maga obra na un solo lugar. Ya dala el de suyo trabajo na aquel catedral con renombre na todo el pais, cosa ya lleva con si Larrazábal a crea con maga obra para el Catedral Metropolitana de Guayaquil y el Basilica Catedral de Ambato. Tambien ya crea ele con maga ventana de vitral para el Academia Militar de Quito (que ya cerra na 1991), el Unidad Educativa San José La Salle de Guayaquil y el casa del cuencano empresario si Guillermo Vázquez.

Durante el resto del de suyo carrera, ya crea si Larrazábal con 87 maga obra de vitral, incuntrao na el gran mayoria del maga provincia de Ecuador. Ya mori si Larrazábal de cancer de pulmon a ultimo hora del 29 de julio de 1983, o na el madrugada del siguiente dia. Siguro ya causa el enfermedad el exposicion, por parte de si Larrazábal, al maga quimico producto utilizao na el fabricacion de vitral, ya que nunca ya fuma ele.

Personal vida

Na Ecuador, ya enamora si Larrazábal con el pintor si Plantilla:Ill. Ya comenza ellos a cohabita na 1960, masquen casao pa si Larrazábal con el de suyo esposa de España (negao el de suyo divorcio). Ya segui si Estrella como pareja de Larrazábal hasta el muerte de ele.

Obra

Segun si Luis Alberto Luna Tobar, si Larrazábal "un teologo que ya medita con luz y color sobre maga vitral, na busca del rostro de Dios" (English: a theologian who meditated with light and color on stained glass, in search of the face of God).^{[cita requerida]} Hinde limitao al vitral el artistico talento de si Larrazábal, ya que ele tambien un talentoso pintor, escultor, alfarero y fotografo. Na el de suyo maga ultimo año, ya dedica ele con un buen parte del de suyo tiempo al fotografia.

Legao

Na el antiguo emplazamiento del de suyo estudio, incuntrao ya el Galería Larrazábal na Cuenca, nombrao na el de suyo honor. Ya ocurri el primer exposicion del obra de si Larrazábal na Cuenca na 2012 y mas tarde ya viaja a otro maga ciudad na Ecuador. Ya ocurri un segundo exposicion na el Pontificia Universidad Católica del Ecuador (Quito, 2013).

Mas lectura

• (en español) Guillermo Larrazábal Arzubide (1907-1983): la vidriera ecuatoriana, treinta años hacia la luz. Quito: Ministerio de Cultura del Ecuador. 2011. ISBN 978-9942-07-170-5. 
• (en español) Guillermo Larrazábal: un artista vasco en Ecuador (1907-1983). Eusko Jaurlaritzaren Argitalpen Zerbitzu Nagusia (Servicio Central de Publicaciones del Gobierno Vasco). 1992. ISBN 978-84-457-0121-8. 
• (en español) G. Larrazábal, el arte en el vitral. Banco Central del Ecuador. 1988. OCLC 20296847.