Maga discursos na Chavacano

Cay este un celebracion de la cultura de zamboanga, Favor permiti conmigo conversa con ustedes en Chavacano, el lenguaje nativo del pueblo alegre yo que taqui ya tamen el tiempo del Fiesta de Zamboanga Hermosa y el Fiesta Pilar cay este un ocasion para acorda y dale mira el diaton maga bonito tradicion como el maga baile que hay presenta este tarde maga diferente escuela del pueblo sabe man ustedes que el Zamboanga amo el uno del mas viejo pueblo na Filipinas. El diaton lugar el primer comunidad que ya planta el maga Español na Mindanao. Y antes pa del venida del Español el Jambangan ya el jardin de flores del maga Subano, el mapa verdadero nativo del pueblo. Diaton comunidad un gran mezcla de cuantos tribos -tribos de Mindanao y tribos de Visayas y Luzon-. Mucho del de ellos maga tradicion y costumbre ya queda canaton. Tiene tambien kita el influencia del maga estranjeros quien ya visita na diaton lugar como el Español, el Americano y el Chino. Fuerte canaton el influencia del Español que bien claro na diaton lenguaje, na diaton costumbre, na diaton maga celebracion y masquen na diaton comida. Puede kita habla que el Zamboanga es un comunidad unico na pais. No hay igual canaton na otro parte del Filipinas. Alli ta saca kita orgullo. Poreso debe kita protege y conserva el diaton cultura cay si perde ese, dificil ya llevanta otro igual. Preserva kita el Chavacano, el maga baile Zamboangueño y el diferente modo de cocida del diaton maga vianda. Preserva tambien kita el maga lugar y edificio que tiene valor de cultura o historia como el Ayuntamiento de Zamboanga, el Fortaleza del Pilar, el Parque de Pasonanca y el campo de golf na Calarian. Estos maga parte del cosa que ta hace con el Zamboanga y ta hace canaton Zamboangueño. Por parte del gobierno local, ta dale yo gracias con mis ciudadanos quien ya aparece este tarde para aprecia estos maga baile na camino, que es un parte del entero fiesta del Zamboanga Hermosa. Gracias tambien con el maga jovencitas y jovencitos que ta participa na maga baile y con el de ellos maga maestras y mayores. Man alegria kita cay este el tiempo de celebración diaton. Bienvenidos".