Potenciano Gregorio

Desde Chavacano de Zamboanga Wikipedia - El Libre Enciclopedia
Saltar a: navigacion, buscar

Potenciano Gregorio, mas conocido como Potenciano Gregorio, Sr. (19 de Mayo, 1880 hasta 12 de Febrero, 1939) es un Bicolano musicero. Ele el compositor del Sarung Banggi (Un Noche), el con todo famoso cancion na lenguaje Bicolano.

Si Potenciano Gregorio ya nace na pueblo de Lib-og (ahoramiente, el Santo Domingo) na provincia de Albay en Las Filipinas. Si Narciso Gregorio y Canuta Valladolid (o Balladolid) el su maga parientes. Na su joventud, ele ya prinsipia aprende tuca violin y na su jovenes edad, con ele ya reconoza por su talento. Ele ya aprende tambien tuca maga otro instrumento como el bandurria, el gitara y el piano. Despues y mas adelante, ele ya prinsipia escribi maga musica por el su iglesia local y tiene tiempo con colaboracion junto con su mayor hermano Bernardo. el quien ya organiza con el de ella banda local de Lib-og. Si Potenciano. despues, ya queda maestro del banda hasta que'l tiempo ele ya entra na Banda Constabulario del Filipinas en año 1919.

Mucho ta cre que si Potenciano Gregorio ya composita con el Sarung Banggi cuando ele 17 años de edad lang. Tiene maga diferente version que ta dale mira paquemodo ele ya composita con este cancion. Si Hilario Balilo, el antes alcalde de este pueblo ya habla que el compositor ya escribi con el cancion un noche despues el musicero ya oi el cancion del pajaro y el maga sonor del ojas de maga pono. Este informacion, base na version que ya recibi ele con Justo Gregorio, el sobrino de Potenciano. Si Resurrecion Gregorio, un apo de Potenciano ta cre, sin embargo, que el cancion ya escribi del año 1897 cuando el erupcion del volcan Mayon ya ocuri y initialmente, el compositor quiere dedica con el cancion con su novia Dominga Duran con quien ele ya casa despues.

Si Potenciano Gregorio, despues cuantos tiempo, ya vende el derecha del cancion con Constancio de Guzman.

Ele tambien ya escribi maga otro canciones como el Pusong Tagub nin Sakit y Hinuyop-hoyop nin Dios.

Del año 1919, ele ya entra na Banda Constabulario del Filipinas bajo na direccion del Col. Walter Loving.

Si Potenciano Gregorio amo el uno de maga con quien ya invita para competi contra maga otro musicero na Golden Gate International Exposition del año 1938. Mientras tanto ele na America, ele ya mori por enfermedad pneumonia del año 1939 na Honolulu. Su cadaver ya lleva volve na Filipinas ya ya entera con ele na Sementerio La Loma en Manila. Del año 2005, su cadaver ya exhuma y ya lleva na su pueblo de Santo Domingo donde con ele ya entera otra vez.

Del año 1961, un fuego ya destroza con el casa de antepasado de Potenciano Gregorio.

Maga Referencia[editar | editar código]