Ulan

Fuerte ulan na un tejado.

El ulan (un colectivo nombre, y un prestamo del hiligaynon ulan) es un atmosferico fenomeno iniciao por maga gota de agua que ta sufri con condensacion de vapor na el atmosfera, y que luego ta sufri con precipitacion. El ulan es un principal componente del ciclo de agua y es responsable de deposita con el mayor parte del dulce agua na el Tierra. Ta proporciona ele con agua para maga hidroelectrico central y el riego de maga cultivo, ademas de maga adecuao condicion para manada tipo de maga ecosistema.

El principal causa del produccion de ulan es el humedad que ta move a lo largo de maga tridimensional zona de maga contraste de temperatura y humedad, conocio como maga frente. Si tiene bastante humedad y movimiento hacia arriba, ta cae el precipitacion de maga convectivo nube (es deci, maga nube con fuerte ascendente vertical movimiento) como maga cumulonimbus (maga nube de trueno) capaz de organiza na maga estrecho banda de ulan. Na maga montañoso area, posible el fuerte precipitacion donde maximizao el anabatico viento dentro del barlovento lado del terreno a un elevacion que obliga con el humedo aire a condensa y cae na forma de ulan a lo largo del maga ladera del maga montaña. Al sotavento lado del montaña, puede maga desertico clima existi debio al seco aire causao por el descendente flujo que ta provoca con el calentamiento y el secao del masa de aire. Ta trae el movimiento del monzonico vaguada, o intertropical zona de convergencia, con maga lluvioso estacion a maga clima de sabana.

Ta lleva el efecto del urbano isla de calor a un aumento de ulan, tanto na cantidad como na intensidad, a sotavento del maga ciudad. Ta causa tambien el global calentamiento con maga cambio na el global padron de precipitacion, incluio maga mas humedo condicion na el este de America del Norte y maga mas seco condicion na el maga tropical pais (como el Filipinas). El Antartida el mas seco continente. El promedio anual precipitacion a mundial nivel sobre el tierra es de 715 mm, pero na todo el Tierra es mucho mayor, de 990 mm. Ta usa maga sistema de climatico clasificacion, como el de si Köppen, con el promedio anual precipitacion para ayuda a diferencia entre el maga diferente climatico regimen. Utilizao el maga pluviometro para medi con el precipitacion, y estimable el cantidad de precipitacion mediante meteorologico radar.