Gubaz Sanikidze

Si Gubaz Sanikidze (Plantilla:Lang-ka, nacido el 2 de febrero de 1967) es un georgiano politico. Ta sirvi como miembro del Parlamento de Georgia desde el Unido Nacional Movimiento (UNM) desde 2020. Originalmente un historiador, ya obtene ele con un sede na el legislatura de Georgia, durante el maga Georgiano legislativo eleccion de 1990 que ya mira con el decadencia del Sovietico regimen, como miembro del conservativo Tradicionalista Partido. Despues del Georgiano Civil Guerra, ya forma el de suyo partido con un alianza con el autoritario lider de Adjara, si Aslan Abashidze, y fue elegio a un segundo termino como MP na 1999, durante el que ya queda un oponente al Presidente Eduard Shevardnadze. Despues del ascenso al poder de un nuevo gobierno con el Revolucion de maga Rosa, ya queda ele na el oposicion y ya perde con el de suyo sede na 2004. Con otro maga veterano politico ya lanza ele con el Nacional Foro. Brevemente ya sirvi con un tercer termino na Parlamento na 2008, pero ya renuncia con el de suyo sede dos semanas mas tarde.

Un vocal critico de Presidente Mikheil Saakashvili, ya uni si Sanikidze con el coalicion Georgiano Sueño cuando ya derrota este con UNM na 2012, y ya gana si Sanikidze con un cuarto termino na Parlamento como Mayoritanio MP desde Kutaisi. Ya sirbi ele como Presidente del Diaspora, entonces Presidente del Comite del Caucaso, durante el que ya advoca para maga mejor vinculo entre Georgia e Irán, y como Vice-Presidente del Parlamento. Na 2016, ya deja si Sanikidze del Nacional Foro y ya queda un oponente del gobierno GS. Fue reelegio, esta vez como miembro del faccion "Fortaleza na Unidad", na Parlamento na 2020.

Personal vida y educacion

Ya nace Gubaz Sanikidze na el 2 de febrero de 1967, na Kutaisi, na aquel maga tiempo na Sovietico Georgia. Despues de sirvi con el de suyo mandatorio militar servicio na Tbilisi, ya estudia ele na Estatal Universidad de Tbilisi, na Facultad de maga Oriental Estudio, donde ya gradua con un diploma na Oriental Nacional Geografía. Durante aquel tiempo, ya interna ele na Universidad de Damasco na Siria. Es un Doctor de maga Historico Ciencia.

Ya trabaja como asistente na Departamiento de Anciano Mundial Historia na 1990–1991 y na 1995–2005 para EUT.

Ta casao y tene con dos bata. Ademas de georgiano, ta habla con ruso y árabe.

Politico carrera

Na el Supremo Consejo

Ya entra si Gubaz Sanikidze con el politica poco despues de gradua, na medio del pro-independencia georgiano nacionalista movimiento. Na 1990, ya uni con el Union de maga Georgiano Tradicionalista, uno del maga primero legalmente reconocio politico partido na Sovietico Georgia, un conservativo organizacion que ya favorece con el independencia y el monarquismo.

Na el Supremo Consejo, ya apoya con si Zviad Gamsakhurdia como el primero no-comunista lider de Georgia. Na 9 de abril de 1991, fue ele uno del maga signatorio del Acto de Restauracion del Independencia de Georgia. Na el subsecuente golpe de estado contra Gamsakhurdia, el proclamacion de un Militar Consejo y el abolicion del legislatura el 2 de enero de 1992, abruptamente ya cumpli el de suyo termino.

Segundo termino como MP

Despues del Georgiano Civil Guerra, ya regresa si Gubaz Sanikidze al politica, y ya queda el Vice-Presidente de UGT na 1995. Na 1999, ya uni el partido con el electoral bloque formao por el strongman gobernador de Adjara, si Aslan Abashidze, y si Sanikidze fue elegio al Parlamento durante el maga eleccion de aquel año por medio del Democratico Union para el Reavivamiento. Desde 2000 hasta 2004, ya sirvi ele como cabeza del legislativo delegacion de Georgia al maga árabe pais.

Na oposicion al Presidente Eduard Shevardnadze, ya sirvi como diputado presidente del faccion UGT na Parlamento, y ya retene con el puesto despues de que ya separa el partido del Reavivamiento. Rutinariamente ya critica ele con el gobierno de Shevardnadze por causa del suyo falta de transparencia na cuanto al exterior politica, y por causa del suyo percibio falta de progreso na el proceso del resolucion del georgiano-abjasio conflicto. Durante el maga Georgiano legislativo eleccion de 2003, ya uni el de suyo partido con el de Nino Burjanadze para forma con el Nacional Democratico Alianza y fue Sanikidze el 18vo na el electoral lista del coalicion. Maskin ya gana con un sede na el carrera de aquel año, ya conduce el Revolucion de maga Rosa con el cancelacion del maga resulta y ya falla el de suyo partido colecta con bastanta maga voto na maga Georgiano legislativo eleccion de 2004.

Despues del Revolucion de maga Rosa, brevemente ya queda si Gubaz Sanikidze el presidente del parlamentario faccion del UGT (que ya perde con el de suyo representacion na abril de 2004). Durante el maga primer mes del presidencia de Mikheil Saakashvili, fue Sanikidze uno del maga primer oponente del popular pro-Occidental gobierno, y ya critica ele con el distribucion del maga poder entre Saakashvili, Zurab Zhvania y Nino Burjanadze, ademas del presunto presion del gobierno na el maga independiente politico programa de maga entrevista na television. Durante el crisis de Adjara de 2004 que ya mira con el derrocamiento de Aslan Abashidze, ya acusa si Sanikidze con el gobierno de "agrava con el situacion".

Na oposicion a Saakashvili

El 15 de diciembre de 2006, fue si Gubaz Sanikidze uno del maga veterano politico que ya crea con el Nacional Foro (NF), un politico partido na oposicion liderao por el diplometa Kakha Shartava. Ansina, ya senta si Sanikidze na el Politico Consejo del partido y ya lidera con el de suyo afiliado na Tbilisi, a menudo considerao como un figura mas vocal y mas popular que Shartava mismo. Ya alinea con el coalicion Unio Oposicion que ya apoya con el intento de si Levan Gachechiladze para el presidencia na 2008. Na maga eleccion de aquel año, fue Sanikidze el candidato del UO para el distrito de Kutaisi, contra dos maga ex-gobernador de Imereti, Akaki Bobokhidze (Unio Nacional Movimiento) y Temur Shashiashvili (Cristiano-Democratico Alianza), mientras que ya abandona con el carrera el Industrialista Temur Shalikiani para endosa con Sanikidze. Maskin perde con el carrara, ya gana pa con un sede na Parlamento por medio del electoral lista del Unio Oposicion (na el cual fue na 7mo posicion como el miembro del rango mas alto de NF).

Sin embargo, ya rehusa si Sanikidze a acepta con el de suyo parlamentario sede por causa de alegaciones de masivo electoral fraude. Uno de 12 maga MP que ya hace este, ya referi ele a todo el maga legislador que ya acepta con el maga de suyo sede "maga traidor contra Georgia" y ya amenaza con "el uso del fuerza para preveni con el convocacion del Parlamento". Con rapidez ya queda ele uno del maga mas radical oponente a Saakashvili: ya llama para el de suyo renunciacion, ya culpa con ele para el Ruso-Georgiano Guerra, ya compara con ele al Checheno lider Aslan Maskhadov, al principio ya rehusa con cualquier discusion con el gobierno para termina con el politico crisis, y na mayo de 2009 ya organiza con un bloqueo del Autovia Este-Oeste durante el maga militar ejercicio entre NATO y Georgia.

Na mayo de 2009, ya ablanda ele con el de suyo posicion. Fue uno del maga negociador del oposicion na el maga discusion con el Presidente del Parlamento David Bakradze y fue quien ya pedi con un "incondicional reunion" con el Presidente Saakashvili. Durante el maga planeao protesta por el oposicion na el Dia del Independencia na 2009, ya rehusa ele a participa y ya anuncia el enfoque del maga de suyo esfuerzo na el aumento del apoyo para el NF fuera de Tbilisi. Na noviembre de 2010, fue NF uno del maga partido que ya lanza con el maga formal negociacion con el gobierno sobre el electoral reforma, maskin ya resumi con el maga protesta na el mismo mes. Na el 27 de septiembre de 2011, fue si Sanikidze uno del primario organizador de un marcha na Tbilisi para conmemora el 18vo aniversario del Caida de Sujumi.

Na julio de 2011, ya uni el NF con cinco otro maga partido de oposicion para forma un electoral bloque para el maga Georgiano legislativo eleccion de 2012. Ya colapsa el grupo durante de tres maga mes, pero pronto ya uni si Gubaz Sanikidze con el empresario Bidzina Ivanishvili (afiliao con Rusia) y el de suyo coalicion Georgiano Sueño. Ya corre ele como el candidato del coalicion para el distrito de Kutaisi, contra el ex-mayor Giorgi Tevdoradze (UNM) y el MP Giorgi Akhvlediani (Cristiano-Democratico Movimiento). Durante el campaña, ya libera el maga autoridad con maga grabacion de audio que supuestamente ya revela con un llamada de telefono entre Sanikidze y Valery Khaburzania (el ex-Ministro de Estatal Seguridad, basao na Rusia) donde ya ofrece si Sanikidze con dinero a Khaburzania a cambio de facilita con el liberacion de un ladron na el ley de un Ruso prision. Segun otro grabacion, liberao mas tarde, ya deci si Sanikidze que para ele hinde fue importante un politico carrera sino maga metodo para "queda un millonario". Ya nega si Sanikidze con el veracidad del maga grabacion y nunca hay formal investigacion sobre el asunto. Maskin el maga escandalo, ya derrota si Gubaz Sanikidze con el de suyo maga oponente y ya gana justo cuando ya gana Georgiano Sueño con un derrumbamiento na todo Georgia.

Con el dominante coalicion

Como un MP elegio del dominante coalicion, ya queda si Gubaz Sanikidze uno del maga primario miembro de Parlamento, elegio como Presidente del Diaspora y del Comite sobre el maga Asuntos del Caucaso por el personal eleccion del Primer Ministro Bidzina Ivanishvili. Ansina, ya advoca si Sanikidze para que lanza el maga autoridad con mejor maga relacion con el Caucaso del Norte, y ya deci que debe Georgia integra con el Unión Europea "hinde como maga Europeo sino como maga Caucasico Europeo". Ya apoya ele con mas actividad para el integracion del maga etnico minoridad, y ya anuncia con un programa de pasantia para el maga etnico armenio y azerbaiyani. Na Parlamento, ya lidera con el Parlamentario Consejo para el Coordenacion del maga Legislativo Proceso para el maga Abjasio y Adjario Autonomo Republica, y ya sirvi na el Constitucional Comision de 2016 que ya hace de Georgia un lleno parlamentario republica. Un firme apoyador del descentralizacion, ya apoya con un proyecto de ley, para el creacion de maga consultativo cuerpo para el maga regional gobernador y el expansion del maga mayoral eleccion na todo el pais. Durante el de suyo termino, fue uno del maga menos popular miembro del dominante coalicion, el unico lider del Georgiano Sueño con maga desfavorable calificacion.

Tamen ya apoya si Sanikidze con el maga relacion entre Georgia e Irán y ya lidera con el Parlamentario Grupo para el Amistad entre Georgia e Irán. Ya visita con Teherán tres maga vez na 2014 y 2015, mientras ya pedi que el Ministro de maga Exterior Asunto de Georgia trabaja para el profundizacion del maga bileteral relacion. Ya dale ele con el bienvenida al Plan de Integral Conjunto Accion (es deci, el nuclear acuerdo con Irán) y ya llama con este "un ocasion para maga masivo oportunidad para Georgia". Fue ele parte del delegacion liderado por Primer Ministro Irakli Garibashvili a China na 2015 para negocia un tratado de libre comercio. Ya reclama que personalmente ya preveni el reconocimiento, por un árabe pais, del independencia de Abjasia y Osetia del Sur, maskin hinde ya declara cual. (Ya reconoce Siria con dos maga separatista republica na 2018, y publicamente ya declara un tal MP de Jordania na 2019.) Ya nega con este el Ministro Ministro de maga Exterior Asunto.

El primer fisura dentro del coalicion GD que ya mira con el salida del maga Libre Democrata del partido y el dimision del Vice-Presidente del Parlamento, Zurab Abashidze, ya permiti que Gubaz Sanikidze obtene con el de suyo puesto na 19 de febrero de 2015. No obstante, puesto que ya anuncia GD con el de suyo intencion de no forma con un coalicion na el maga Georgiano legislativo eleccion de 2016, ya deja si Sanikidze y el NF del coalicion, y ya anuncia el NF con un independiente electoral lista na 4 de abril de 2016, con Sanikidze na el segundo posicion del lista. Hinde ya gana el NF con cualquier sede na Parlamento, el 11 de noviembre, ya deja si Sanikidze del partido que ya ayuda a funda.

Regreso al oposicion

Por falta de un sede na Parlamento, y por causa del suyo resignacion del NF, ya queda si Gubaz Sanikidze un comentador de politica sin afiliacion, y ya aparece gayot na el television para critica el gobierno, mientras que ya rechaza con cualquier cooperacion con UNM, na aquel maga tiempo el mas grande partido del oposicion. Na 11 de junio de 2019, ya queda un co-fundador de Victorioso Georgia, un nuevo politico partido fundao por el controversial Ministro de Defensa Irakli Okruashvili, con el anunciao meta de continua con el maga reforma que, segun ya reclama si Sanikidze, ya abandona el Georgiano Sueño. Despues del arresto un semana mas tarde de Okruashvili como uno del maga lider de un anti-Ruso protesta que ya trata de entra na el edificio de Parlamento, ya llama si Sanikidze con ele un politico prisionero y ya declara que "ta tene si [Bidzina] Ivanishvili con un mental trastorno y ta toma con el maga de suyo orden de Vladimir Putin".

Cuarto termino como MP

Poco antes del maga Georgiano legislativo eleccion de 2020 ya uni si Gubaz Sanikidze con el electoral coalicion "Fortaleza na Unidad" como miembro de Victorioso Georgia. Este es un coalicion de maga politico partido liderao por el UNM, un partido con el que vocalmente ya opone si Sanikidze por todo su carrera. Ya critica gayot con este gesto el anterior Secretario del Nacional Consejo para el Seguridad, si Giga Bokeria, que ya acusa con UNM de "traiciona con el maga valor del Revolucion de maga Rosa". El 16to na el electoral lista del partido, ya gana con un sede na Parlamento, pero ya rehusa reconoce este por causa de masivo electoral fraude, y ya trata de formalmente renuncia con el de suyo puesto. Pronto ya quede uno del maga mas radical miembro del oposicion, y publicamente ya apoya con el regreso del exiliao Mikheil Saakashvili para lidera el oposicion (ya causa este disputa con un fisico confrontacion entre ele y el Presidente de UNM, Nika Melia, na television na vivo). Ya revela una grabacion goteao de un llamada de telefono entre Sanikidze y Temur Alasania (un adinerao empresario con maga cercano vinculo al comercio de armas, ademas del tio de Saakashvili) con maga discusion sobre el proclamacion de un "alternativo gobierno" y el derrocamiento por fuerza del maga actual autoridad.

Despues de un breve acuerdo, facilitao por el Unión Europea, entre Georgiano Sueño y parte del oposicion na abril de 2021, ya acepta si Gubaz Sanikidze y el resto de UNM con el de suyo maga sede na el legislatura, y ya llama Sanikidze mismo con este un "estrategico decision". Actualmente es miembro del Comite de Defensa y Seguridad.